انا اسفة انا غلطانة الى فريق بداية بورسعيد

السلام عليكم و رحمة الله و بركاته
صباح الخير عليكم
وحشتونى جدا

طبعا ممكن البعض بعد ما يقرا المقدمة دى هايقول :-

( يعنى مش باين !!!!!
محدش بيشوفك على المنتدى غير كل فين و فين )

و بصراحة ليكو حق و لازم اعترف و ارفع يدى و اقول انا اسف انا غلطان
مهما كانت المشغوليات كان لازم اخصص جزء من وقتى للمنتدى حتى لو ساعة كل اسبوع
لان ده المكان الوحيد اللى ممكن يجمعنا كلنا فى اى وقت

الرد بعدها هايكون:-

( و ليه صحوة الضمير الفجاءة ايه اللى حصل؟؟؟؟)

و الرد السبب مجموعة أرقام على المنتدى

1-

موضوع لماذا هجرتم البيت 181 مشاهدة و 38 رد بس
موضوع شعر سلمى 106 مشاهددة و 21 رد بس
موضوع لقاء الاحبة 72 مشاهدة و 7 رد بس

عدد المشاهدات الكبير ده للمواضيع دى بذات تدل على حجم الترابط اللى بينا و الاهتمام اللى عندنا بالفريق طب ليه عدد الرود يكون قليل كده ممكن ناس تمل و تفتكر مافيش اهتمام باللى بتقوله و تهجر المنتدى.

2-

موضوع علمتنى المنتديات
ده موجود فى المنتدى العام القسم العام
اول ما قريته حسيت ان الكلام ليكى يا جارة يعنى دعوة للمشاركة على المنتدى و عزاء لعدم الردود
45 واحد شافوا الموضوع و مع ذلك واحد بس اللى رد
اعتقد ان المفترض الناس تشارك و ترد
و تقول لا احنا مش زى اى حد احنا منتدى فريق بداية حياة المتميز بينا ترابط و تواصل فعال
و ده للاسف محصلش

3- موضوع علمتنى الحياة
ده موجود فى المنتدى العام القسم العام
عبارة عن فكرة مشاركة تجارب الحياة
طبعا فكرة روعة عجبتنى جدا و اتمنيت تكون موجودة فى منتدى بورسعيد
3 بس من 51 واحد شافوا الموضوع بس اللى حابوا يشاركوا الفريق باللى اتعلموه من اخطائهم
3 بس اللى حابوا يجنبوا بقية الفريق الخطا اللى وقعوا فيه

4- موضوع محتاج مساعدتكو
ده موجود فى المنتدى العام القسم العام

طبعا اسم الموضوع المفترض يشد لان من اهدفنا نساعد الناس من حولينا .فازاى مش هنساعد بعض ؟؟؟
العنوان ده اهتم 8 بس يشوفوه و 0 رد مع ان بعده مواضيع كان عليها مشاهدات اكتر من كده بكتير
عجيبة !!!!

و طبعا انا واحد من المسئولين عن الوضع المؤسف ده بسلبيتى و هجرى للمنتدى
ما كنش لازم انسى ابدا انى لازم اتواصل و اتشارك مع فريقى اللى باعتز بيه جدا
ما كنش لازم انسى انى من الفريق و بالتالى من المسئولين عنه و عن المنتدى
ما كنش لازم انسى هدفى فى مساندتى للناس اللى حوليا و منهم فريقى
فلازم اعترف بخطىء لكل الناس اللى حابوا يشاركونى و انا ما شاركتوهمش

اسفة مرة تانية و اوعدكم جميعا انى هاخصص وقت من كل اسبوع للمنتدى

و السلام ختام

والله يا منى انا ما كنتش بدخل المنتدى علشان النت كان عندى فاصل
وانا بعتذر عن عدم دخولى (انا اسفه انا غلطانه )
بس والله انا دايما متابعه الأخبار من اصدقائى متابعه اخبار المنتدى

السلام عليكم ورحمه الله وبركاته
ازيكم جميعا احنا عارفين انكم مشغولين بس والله احنا بنطمن عليكوا عن طريق دخلكم المنتدي بجد والله هي دي وسليه التواصل ربنا معاكو يوفقكم وتدخلوا علي المنتدي باستمرار

ازيكم يا اجمل اصحاب واخوات في الدنيا وحشتوني جدا وافتقدت وجودكم بس انا عارفه ان في ظروف يتمنعكم عن

التواجد المستمر ومقدرة ده بس بجد بتوحشونا واكيد بنحب نطمن عليكم وعلي نفسنا كمان لما نحس اننا لسه متواجدين

زي ما كنا في الفريق وانها مكانتش مجرد فترة وعدت لازم نحس بالاختلاف وعلي فكرة انا مش بلومكم والله انا مقدرة جدا

ظروف اي حد بس بجد من وقت للتاني طمنونا عليكم

ازيكم يا جماعة وحشتونى جدا جدا والله يامنى عندك حق انا كمان لازم اقول انا أسف أنا غلطان للفريق كله

السلام عليكم ورحمة الله وبركاته
هو المفروض الكل يقول انا اسف انا غلطان بس برده لازم نعذر اللى عنده ظروف وده علشان مش كلنا اوقات فراغنا واحدة انا عن نفسي بعتذر انى بقرا المواضيع الجديدة ومش بشارك وده مش لان الموضوع وحش ولكن للاسف لضيق الوقت انا برجع من الاكاديمية متأخرة يدوب الحق اقرا واكتب اللى اقدر عليه علشان الحق انام
بس برده ده مش عذر لان المفروض اننا مش هنخلى الظروف تأثر علينا علشان كده بكرر اقتراحى اننا نحاول نتجمع بعد الصلاة يوم الجمعة اظن ان ده اكتر وقت المعظم بيكون فاضى
ايه رأيكوا

ازيك يامونى وحشانى موت وانا موافقه على اقتراحك لانناداخلين على الامتحانات ولازم ننظم وقتنا وبصراحه مش عاوزة اسيب المنتدى فتره طويله