هكذا علمتنى الحياه فى بورسعيد

السلام عليكم
وفاء شكرى
مدير الشركه المنظمة للدورة التدريبية

الحقيقه اشكر الدكتور الطيب الذى اتاح لى الفرصه للمشاركه فى موضوع احنا ليه بتحب مصر بلدنا
الحقيقه هو كان سؤال مفاجىء لى لانى بحبها من غير ما افكر ليه بحبها زى ماهى كده
وطبعا كلنا طلعنا اللى جوانا من مشاعر واحاسيس فى المناقشه دى
منا الناقم والمستنكر والمتعايش والراضى بالواقع المفروض علينا طالما انه مش قادر يغير اى حاجه من حواليه
رجعت بيتى وانا بسأل نفسى صحيح انا بحب بلدى ليه
وسألت نفسى طيب انا بحب مصر كلها ولا بورسعيد بس
طيب ده انا بحب بورفؤاد اللى جوه بورسعيد اللى هى جزء صغير من مصر
عشت فى اسكندريه وعشت فى القاهره يعنى مش غربه بجد غربه كده وكده يعنى
وبينى وبين بيتى ساعات يعنى ممكن ارجع فى اى وقت بس كنت حاسه بالغربه
فما بالكم لو سبتوها خالص وبينكم وبينها حدود ودول وبحور
تعرفوا
من 15 سنه حى بورفؤاد خصص قطعه ارض لعمل جبانه لاموات اهالى بورفؤاد تعرفوا انى جريت على الحى واخذت استماره ودفعت الرسوم واتفقنا مع مقاول وبنيت قبر لنا فى بورفؤاد علشان يكون فيه مكان ليه فيها لما اموت ادفن فيها بس برضه مش هو ده السبب
عايزه حقيقه واحده واضحه وصريحه تكون مبرر وترجمه لمشاعرى دى
يوم ماحكيت لكم عن قصتى مع لعبه واحد اثنيين ثلاثه اتعلمت وقتها انى مش ممكن انام وانا فى طريق السفر ابدا
وحياه كل واحد منا فى الحياه هى برضه طريق سفر لازم نبص دايما حواليا ونتعلم
يعنى مثلا وانتم مسافرين مع بابا وماما رحله الى القاهره مثلا بابا بيسوق فى طريق السفر قصدى طريق الحياه وبيسوق بسرعه عاليه لان القياده والمناوره مع السرعه العاليه محتاجه انتباه شديد ومهاره علشان يفهم اشارات السيارات الللى حواليه وماشيه جنبه واللى قدامه واللى وراه وبابا وهو بيسوق مش قادر يلتفت او يغفل هو ده قدر بابا فى الحياه
فى الوقت ده بابا محتاج ملاح او دليل جنبه ممكن تكون ماما وممكن تكون انت الابن الكبير وممكن تكونى انتى البنت الكبيره وممكن تكون انت الابن الصغير
وظيفته الملاح او الدليل اللى قاعد جنب بابا يقوله خلى بالك فيه علامه على الطريق مكتوب عليها امامك منحى خطر او امامك كوبرى او مفارق طرق علشان تمشى صح وتوصل لهدفك بالسلامه لازم حد فى العربيه يكون صاحى ويقوم بوظيفته الملاح ده لان لقدر الله لو بابا اضطر ينزل من العربيه فى الطريق او تعب وجلس على الكرسى الخلفى لو انت الملاح سواء كنت انت الابن الكبير او الصغير او كنتى البنت الكبيره او الصغيره لازم تقعد مكانه وتوصل اللى فى العربيه للهدف او محطه الوصول

هى دى وظيفته فريق بدايه انه يكون صاحى ويدل اللى معاه فى العربيه على الطريق
تعرفوا ايام الاستبقاء قبل 73 قبل مانهاجر مره واحنا فى طريقنا للخندق وقت غاره شديده بالليل اول الطابور اصيب بشيظيه ووقع على جنبه ناحيه الرصيف لم يسند على الحيطه علشان لو سند على الحيطه الطابور كله حيخرج على الرصيف المهم الراجل الاول لما وقع كان ابنه وراه ولد صغير الولد الصغير ده كان الملاح جرى بينا فى شوارع فى طريق تانى للخندق غير الطريق اللى كنا نعرفه ووصلنا الخندق وبعدها طلع مع 2 شباب جابوا الاب اللى وقع
انتم يافريق بدايه لازم تكونوا زى الولد الصغير ده اللى جرى بينا للخندق علشان يحمينا لغايه الضرب اللى فوق دماغنا ده يخلص واكيد ان شاء الله حيخلص وينتهى
اعتذر عن الاطاله
وفاء شكرى

رحاب موسى 114 اسرة المستقبل ...احبك في الله .... واتأثر دايما بكلامك جدا ....ياريت لو نعتبريني ذى اولادك ...او اخت صغيرة علشان ما أكبركيش ونقرب اكتر من بعض....جزاك الله خيرا على المشاركات الفعالة ... معنا وكله في ميزان حسناتك

جزاكي الله خيرا يا طنط علي الكلام الجميل ده وجعل الله كل ما تفعلينه في ميزان حسناتك ان شاء الله

اليوم كان جميل جدا بس الله يستر من المنشار يوم السبت الله اعلم ايه اللى ممكن يحصل بس بجد انا مضايقة ان التدريب عدا نصه وان خلاص معدش غير اسبوع وهتوحشونى جدا جدا
ندى الدسوقى

شكرا على الردود
ويارب تكون نظرتكم للحياه والناس اللى حواليكم اتغيرت
وتبصوا على كل حاجه حواليكم بعين تانيه
وطبعا يشرفنى اكون منكم بس عجوزه شويه عنكم
ويابشمهندسه رحاب يشرفنى طبعا تكونى بنتى او اختى او صحبتى
اللى تشوفيه والسن ده مش مهم عندى
لانى حقيقى استمتعت بكل مرحله فى حياتى ومازلت والحمد لله
خالص تحياتى
وفاء